Thursday 16 January 2014

പ്രണയിനി


ഇടനാഴിയിലെങ്ങോ അവളുണ്ടാവും...
നിഴല്‍മേഘങ്ങള്‍ക്കിടയില്‍,
ആദ്യചുംബനത്തിന്‍റെ കനല്‍പ്പൊത്തുകളിലൊളിച്ച്..   
കാല്പനികതയെ പ്രണയിച്ച്

കാല്‍പനികതയില്‍ ജീവിച്ച്...!
 

എന്‍റെ പ്രണയിനി...!
വെളുത്ത തുടകളിലെ നനുത്തമുടിയിഴകളില്‍
എന്‍റെ പ്രണയത്തെ വരിഞ്ഞുകെട്ടിയവള്‍..
മൌനത്തെ മിഴികളിലൊളിപ്പിച്ച്
വാചാലതയില്‍ പാതിയും പങ്കിട്ടവള്‍..
 

എന്നിട്ടും ഓര്‍ത്തെടുക്കുവാനാകാത്തത്
ഇന്നും നിന്‍റെ മുഖമാണല്ലോ...
സഖീ..അന്നാ ചുവന്നവെളിച്ചത്തിന്‍കീഴില്‍
നീ പര്‍ദ്ദയണിഞ്ഞിരുന്നില്ലല്ലോ...?


_______________________(പ്രിയദര്‍ശിനി പ്രിയ)

Thursday 28 July 2011

കാണാക്കയം

                                                          നീ പറയുന്നതൊന്നും 
                                                     എനിക്കിപ്പോള്‍  
                                                   മനസ്സിലാവാറില്ല,
                                                          രതിയുടെ 
                                              ആഴങ്ങളിലേക്കുനീന്തി
                                                  മുത്തും പവിഴവും 
                                             കോരിയെടുക്കുമ്പോള്‍
                                                    നിസ്സംഗതയോടെ 
                                              നിന്‍റെ  മുഖത്തേയ്ക്ക് 
                                              ഞാനുറ്റുനോക്കാറുണ്ട്.
                                              വന്യമായ നിന്‍റെ ഭാഷ 
                                                   എനിക്കന്യമാണ്...
                                                 തവിട്ടുനിറം പൂണ്ട  
                                             നിന്‍റെ കൈപ്പത്തിയില്‍ 
                                                      ഞാനറിയാതെ
                                                          ഒളിപ്പിച്ച
                                                              നിന്‍റെ 
                                             പൂച്ചനഖങ്ങള്‍ക്കിടയില്‍
                                             പറ്റിച്ചേര്‍ന്ന മാംസത്തിന് 
                                                             എന്‍റെ 
                                                  കരിഞ്ഞഗന്ധമാണ്..
                                           കാണാക്കയങ്ങളിലെങ്ങോ
                                                     നീ മറന്നുവെച്ച 
                                                        പാവയ്ക്ക്
                                              എന്‍റെ  പോളകളടര്‍ന്ന
                                                 ചാരക്കണ്ണുകളാണ്..
                                                നീ പറയുന്നതൊന്നും
                                                    എനിക്കിപ്പോള്‍
                                                   മനസ്സിലാവാറില്ല,
                                                  എന്‍റെ കാഴ്ചയില്‍
                                                      നിനക്കിപ്പോള്‍
                                                           ശവപ്പെട്ടി
                                                    ചുമക്കുന്നവന്‍റെ
                                                           മുഖമാണ്.. 
__________________________________________________

Thursday 21 July 2011

ടോം ആന്‍ഡ്‌ ജെറി





നിനക്കറിയാവുന്നതെല്ലാം 
കളിയായിരുന്നു.............
ടോമിന്  ജെറിയെന്നപോലെ 
നിനക്കുപിന്നാലെ എത്ര ഓടി ഞാന്‍.....
വിരലുകള്‍ കീറി എന്‍റെ ചോരയില്‍ 
എത്ര  സ്വപ്‌നങ്ങള്‍  തീര്‍ത്തു............
ഞാനറിയാതെ  നീയെന്നിലേക്ക് 
പതുങ്ങിയപ്പോള്‍ ,
നോവിറ്റുന്ന വിരലുകളില്‍ 
ഒന്നു  തൊട്ടപ്പോള്‍,
എന്‍റെ  മിഴികളില്‍  നീര്‍മുത്തിന്‍റെ തിളക്കമുണ്ടായിരുന്നു...........
വര്‍ഷങ്ങളാല്‍  വിങ്ങിയ 
കാത്തിരിപ്പുണ്ടായിരുന്നു..........
എന്‍റെ  പ്രണയത്തില്‍  അധരം 
ചേര്‍ത്ത്  അവസാനതുള്ളിയും 
നീ നക്കിയെടുത്തു പിന്തിരിയുമ്പോള്‍
അറിയാതെയെങ്കിലും  
ഞാന്‍  വിളിച്ചുപോയ്‌.......... 
" എടി  വഞ്ചകീ................." 
______________________________________________

Saturday 2 July 2011

ലക്ഷ്യം



ആ വഴി തിരിഞ്ഞാല്‍ 
ആദ്യം കാണുന്നത് പുഴയാണ്..
കിഴക്കോട്ടു തിരിഞ്ഞാല്‍ കരിമല..
മലകയറണോ  പുഴകടക്കണോ 
കരയില്‍ തോണിയില്ല 
കൈകളില്‍ കയറില്ല
പിന്നെയുള്ളത് മുകളിലാകാശമാണ്
പിന്തിരിഞ്ഞു നോക്കിയപ്പോള്‍ 
വന്ന വഴി കാണാനില്ല.... 
ചുമലില്‍ ചിറകുമുളയ്ക്കുന്നുണ്ടോ
തടവി നോക്കി ....
ചിറകിനുപകരം രണ്ടു മുഴകള്‍ 
കൂന്നുതുടങ്ങിയപ്പോള്‍ 
കയറിപ്പിടിച്ചത് മരക്കൊമ്പില്‍ , 
ചില്ല പൊട്ടി ഊന്നുവടിയായി...
ഇനി കുത്തി കുത്തി മലകയറാം, 
മുകളിലെത്തുമ്പോള്‍ 
അപ്പുറത്തൊരു സ്വര്‍ഗ്ഗം കാണാം...
________________________________

Wednesday 22 June 2011

രണ്ടു കവിതകള്‍

പുഴു 


പുഴുവാകണം ,
പട്ടുനൂല്‍  നെയ്തിട്ട്
പാശ്ചാത്യനെ ഉടുപ്പിക്കാനല്ല 
പുസ്തകതാളില്‍
പറ്റിച്ചേര്‍ന്നു കിടക്കാന്‍,
ബുദ്ധനെയും 
ടാഗോറിനെയും സ്മരിക്കാന്‍...
___________________________________




മുറ്റം


കുറ്റിച്ചൂലില്‍
ആകാശം വരച്ചു ,
മേഘങ്ങള്‍ സൃഷ്ടിച്ചു,
കൊടുംകാറ്റു വീശി, 
വിപ്ലവം തോറ്റപ്പോള്‍
അരപ്പട്ട ബാക്കിയായ്‌...
                                ______________________________  

Sunday 12 June 2011

സമീര


               അഞ്ജുനായിലെ  തിരകള്‍ക്ക്
                        ബാര്‍ബിഡോളിന്‍റെ  
                   നീലക്കണ്ണുകളായിരുന്നു...
              ബീച്ചിലെ  മണല്‍ത്തരികളില്‍ 
                             സമീരയെന്ന്‍ 
                       അക്ഷരപൂക്കളാല്‍
                പ്രണയം കുറിച്ചിടുമ്പോള്‍
                             പുഴുങ്ങിയ 
                       നിലക്കടലകള്‍ നീട്ടി
                കോമള്‍ഗുഡി പുഞ്ചിരിച്ചു..
                  കൂട്ടുകാരി വന്നില്ലേയെന്ന 
                   അവളുടെ ചോദ്യത്തിന് 
                             സമീരയോളം 
                       ദൂരമുണ്ടായിരുന്നു..
                   കൈലേസില്‍ സൂക്ഷിച്ച 
                      ക്ഷണക്കത്തെടുത്ത്
             അവള്‍ക്കുനേരെ നീട്ടുമ്പോള്‍ 
             സമീര ഉള്ളിലിരുന്ന് കിതച്ചു ..
                              ഗുഡിയുടെ 
                      നിറഞ്ഞ മിഴികളില്‍ 
          അഞ്ജുനായിലെ മണല്‍പ്പരപ്പില്‍
              വഴിപിരിഞ്ഞുപോയവരുടെ 
                 ആത്മാക്കളുണ്ടായിരുന്നു..
               പിന്നെയും സഫലമാവാത്ത 
                               ഒരായിരം
                  കിനാക്കളുണ്ടായിരുന്നു...

 ______________________________________________

Tuesday 7 June 2011

ഒരു പൂവിന്‍റെ ഓര്‍മ്മയില്‍



ഞാനോടുകയായിരുന്നു ,
നഗ്നപാളങ്ങള്‍ക്കുമീതെ
വേനല്‍ച്ചൂടേറ്റു  
വേവുന്ന പാദങ്ങള്‍ നീട്ടി..
വീശിയടിച്ചകാറ്റില്‍ ചോരക്കറ, 
മീതെപ്പറക്കുന്ന  കഴുകക്കണ്ണില്‍
വിഷംപുരണ്ട അസ്ത്രമുനകള്‍.
അടിതെറ്റിവീണ  ഉടലില്‍ ,
എന്‍റെ മുടിയില്‍ ,
വേദനയുടെ വടംവലി..
വക്കുകൂര്‍ത്ത കല്ലില്‍ 
ചിതറിയ ചിന്തകള്‍..
അബോധബോധനിലയില്‍ 
സാഗരത്തിന്‍റെ ശാന്തനീലിമയില്‍ 
നങ്കുരം തേടി നീങ്ങുന്ന
പായ്ക്കപ്പലുകള്‍...
ഉമിനീര്‍വറ്റിയ തൊണ്ടയില്‍
ചവര്‍ന്നിറങ്ങുന്ന കൊഴുത്ത ദ്രവം,
കടിച്ചെടുത്ത കീഴ്ച്ചുണ്ടില്‍ നിന്നും
കിനിഞ്ഞിറങ്ങുന്ന  ജീവജലം,
കനക്കുന്ന ഉടല്‍, താഴെ മണ്ണിലേക്ക്
ആഴ്ന്നിറങ്ങുന്ന വേരുകള്‍..
വിറയാര്‍ന്ന  തോളില്‍  
അമരുന്ന തീക്കാലുകള്‍...
പ്രജ്ഞയുടെ  ശേഷിപ്പില്‍
മിഴികള്‍ പ്രാര്‍ത്ഥിച്ചതും 
മരണമെന്ന മഹാവൈദ്യനെ..




_________________________________________________ 
 
Copyright (c) 2010 കീരവാണി. Design by WPThemes Expert

Themes By Buy My Themes And Web Hosting Reviews.